Dərsdənkənar atletika məşğələlərində VII-VIII sinif şagirdlərinin fiziki hazırlığının artırılmasının tədqiqi

Abstract

Aktuallıq. Hal-hazırda böyüməkdə olan gənc nəslin fiziki hazırlıq və fiziki inkişafının təmin edilməsi dövlət səviyyəsində həll edilməli olan ən aktual problemlərdən biri hesab olunur. Çünki son zamanlar məktəblilərin fiziki tərbiyəsi ilə bağlı aparılan tədqiqatların nəticələri göstərir ki, hal-hazırda məktəbyaşlı uşaqların fiziki hazırlıq və fiziki inkişaf səviyyələri müasir dövrün tələblərinə cavab vermir. Bu problemin yaranması bir sıra əsaslandırılmış səbəblərdən irəli gəlir. Məlum olduğu kimi, gənc nəslin fiziki hazırlıq və fiziki inkişafının bünövrəsi bilavasitə ümumtəhsil məktəblərində qoyulur. Ona görə də böyüməkdə olan gənc nəslin fiziki inkişaf problemlərinin həll edilməsi haqlı olaraq ən vacib sosial-pedaqoji vəzifələrdən biri hesab olunur. Məktəblilərin sağlamlıqlarının möhkəmləndirilməsi üzrə təşkil olunan ən perspektivli istiqamətlərdən biri də onların fiziki inkişaf və fiziki hazırlıqları üzərində kompleks şəklində aparılan monitorinq hesab olunur. Elmi cəhətcə əsaslandırılmış və düzgün tərtib edilmiş monitorinq sistemi məktəblilərin fiziki sağlamlığını təhlil etmək, qiymətləndirmək və proqnozlaşdırmaqla yanaşı həm də bu prosesin daha da təkmilləşdirilməsi istiqamətinə yönəldilən korreksiyaedici proqramların tərtib edilməsi üçün əlverişli imkanlar yaradır. Şagirdlərin sağlamlığının möhkəmləndirilməsi üçün müxtəlif rasional hərəkət rejiminin və sağlamlaşdırıcı fiziki hərəkətlərin tətbiq olunması xüsusi əhəmiyyət kəsb edirlər. Bu tipli hərəkətlərdən istifadə edərkən təlim prosesinə olan tələbatlar və məktəblilərin fiziki keyfiyyətlərinin inkişaf qanunauyğunluqları nəzərə alınmalıdır. Maddi-texniki bazası zəif olan məktəblərdə fiziki tərbiyə təliminin düzgün təşkil edilməsinə xüsusi diqqət yetirmək lazımdır. Çünki fiziki tərbiyə təlimində şəraitin mövcud tələblərə cavab verməməsi inkişafda olan orqanizmin formalaşmasına mənfi təsir göstərir. Maddi-texniki bazası zəif olan məktəblərdə şagirdlərin fiziki hərəkət və fiziki inkişaf səviyyələrinin aşağı olmasında əsas səbəb şəraitin müasir tələblərə cavab verməməsi olsa da, məşğələlərin düzgün təşkil edilməsindən də çox şey asılıdır. Bu prosesin daha səmərəli keçirilməsi üçün fiziki tərbiyə müəllimlərinin valideynlərlə əlbir fəaliyyət göstərmələrinin böyük əhəmiyyəti vardır. Tədqiqat mövzusunun seçilməsi, məhz, yuxarıda qeyd edilən aktual problemlərin müəyyən edilməsi ilə bağlıdır. Tədqiqat Bakı şəhərində yerləşən "Ankara məktəb" məktəb-liseyi və Nizami rayon 251 saylı orta ümumtəhsil məktəblərinin VII-VIII sinif şagirdləri üzərində nəzarət aparmağın əsasında həyata keçirilmişdir. Tədqiqatın məqsədi. VII-VIII sinif şagirdlərinin fiziki inkişaf səviyyəsinin öyrənilməsi və əlavə olaraq keçirilən atletika məşğələlərinin vasitəsi ilə məktəblilərin fiziki inkişaf və fiziki hazırlıq səviyyələrinin yüksəldilməsinin eksperimental yolla yoxlanılması.