Fiziki tərbiyə dərslərində və dərsdənkənar məşğələlərdə yuxarı sinif şagirdlərinin vətənpərvərlik hisslərinin formalaşmasının tədqiqi

Abstract

Tədqiqatın aktuallığı. Vətənpərvərlik tərbiyəsi müstəqil vətənimizi müdafiə etməyə hazır olmaq, vətənin yolunda qüvvə və bacarığını sərf etmək, lazım gəldikdə hətta canından keçmək keyfiyyətlərinin formalaşması kimi əsas mahiyyət daşıyır. Müstəqil Azərbaycan dövlətini qoruyub saxlamaq və inkişaf etdirmək, onun sivil dövlətlər arasında öz yerini tutmasına nail olmaq üçün gəncləri vətənpərvərlik hissləri əsasında tərbiyə edən vasitələrdən biri də fiziki tərbiyə dərsləri və dərsdənkənar tədbirlərdir. Şübhəsiz ki, bir çox əməli vərdişlər, vətənpərvərlik hissləri yeniyetməlik və ilk gənclik dövrlərindən formalaşır. Bu gün fiziki tərbiyə müəllimlərinin qarşısında ilkin gənclik dövrünə qədəm qoyan yuxarı sinif şagirdlərində vətənpərvərlik tərbiyəsinin formalaşdırılması başlıca problem kimi durmalıdır. Tədqiqatın problemi. Apardığımız müşahidələr göstərir ki, bu istiqamətdə müəyyən işlər görülmüşdür. Lakin bu heç də müasir tələblərə cavab verən səviyyədə deyil. Müşahidələrimizdən aydın oldu ki, yuxarı sinif şagirdlərinin əsl vətənpərvərlər kimi tərbiyə olunmasında bəzi çatışmamazlıqlar mövcuddur. Bu çatışmamazlıqlara: məktəblərdə lazımi səviyyədə vətənpərvərliklərlə bağlı tədbirlərin keçrilməməsi, müəllimlərin şagirdlərlə bu mövzu ətrafında söhbətlərin aparılmaması, yuxarı sinif şagirdləri arasında VMH yarışlarının çox az keçirilməsi. Bu boşluqların doldurulmasında təlim-tərbiyə ilə məşğul olan bütün qurumlarda, o cümlədən orta ümumtəhsil məktəblərində fiziki tərbiyə müəllimlər lazımi işlər görməlidir. Bu istiqamətdə geniş elmi tədqiqat işlərinin aparılmasına böyük ehtiyac vardır. Tədqiqatın obyekti. Ümumtəhsil məktəblərinin fiziki tərbiyə dərslərində və dərsdənkənar tədbirlərdə yuxarı sinif şagirdlərində vətənpərvərlik hissinin formalaşdırılması prosesidir. Tədqiqatın predmenti. Fiziki tərbiyə dərsləri və dərsdənkənar tədbirlər vasitəsi ilə yuxarı sinif şagirdlərində vətənpərvərlik hissinin formalaşdırılmasıdır.